నయనతార, జై, సత్యరాజ్, రెడ్డిన్ కింగ్స్లే ప్రధాన పాత్రల్లో నూతన దర్శకుడు నీలేష్ కృష్ణ దర్శకత్వంలో రూపొందిన చిత్రం 'అన్నపూర్ణి'.
శ్రీరంగం అయ్యంగార్ కుటుంబానికి చెందిన అన్నపూర్ణి (నయనతార) 'కార్పొరేట్ చెఫ్' కావాలన్న కలను సాకారం చేసుకోడమే ఈ సినిమా. ఈ సినిమాలో నయనతారకు నాన్ వెజ్ వండడంలో చాలా సమస్యలు ఉంటాయి.
నయనతారను ప్రోత్సహిస్తూ నటుడు జై 'శ్రీరాముడు కూడా మాంసాహారం తిన్నాడు' అని అని శ్లోకం చెప్తాడు. ఈ శ్లోకమే ప్రస్తుతం వివాదంలో ఉంది.
అంతేకాదు ఈ సినిమాలో హిందూ పూజారి కూతురు నయనతార కూడా నమాజ్ చేస్తోందట. ఇది హిందూ మత మనోభావాలను దెబ్బతీస్తుందని విశ్వహిందూ పరిషత్ సహా పలు హిందూ సంస్థలు నిరసనను వ్యక్తం చేస్తున్నాయి. ముంబైకి చెందిన శివసేన మాజీ నేత రమేష్ సోలంకి ముంబై పోలీసులకు ఫిర్యాదు చేశారు.
ఈ నేపథ్యంలో ఓటీటీ ప్లాట్ఫామ్ 'నెట్ఫ్లిక్స్'లో ప్రసారమవుతున్న 'అన్నపూర్ణి' సినిమాను ఈ రోజు తొలగించారు. 'అన్నపూర్ణి' సహ నిర్మాణ సంస్థ జీ ఎంటర్ప్రైజెస్ ముంబైలోని విశ్వహిందూ పరిషత్కు ఈ విషయంలో క్షమాపణలు కోరుతూ లేఖ పంపింది, "మీ ఫిర్యాదుల దృష్ట్యా, 'నెట్ఫ్లిక్స్' ఓటీటీ ప్లాట్ఫామ్ నుండి 'అన్నపూర్ణి'ని తక్షణమే తొలగించడానికి మేము చర్యలు తీసుకున్నాము. సినిమాలోని సన్నివేశాలను తొలగించిన తర్వాత సినిమా ప్రసారం కానుంది.
హిందూ మత మనోభావాలు, బ్రాహ్మణ సమాజం మనోభావాలను దెబ్బతీసే ఉద్దేశంతో తాము ఈ సినిమా తీయలేదన్నారు. మీ మనోభావాలను ఏ విధంగానైనా గాయపరిచి ఉంటే క్షమాపణలు కోరుతున్నాం' అని పేర్కొన్నారు.