బాలీవుడ్ నటి కుష్బూ సుందర్ రీఎంట్రీ ఇవ్వబోతోంది. 35 ఏళ్ల తర్వాత మరోసారి బాలీవుడ్ లో నటించడం పట్ల కుష్బూ సంతోషం వ్యక్తం చేశారు.
బాలీవుడ్ నటి, జాతీయ మహిళా కమిషన్ సభ్యురాలు కుష్బూ ప్రధాన పాత్రలో గదర్ 2 ఫేమ్ అనిల్ శర్మ దర్శకత్వంలో ఓ బాలీవుడ్ చిత్రం తెరకెక్కనుంది. 'జర్నీ' అనే టైటిల్ తో తెరకెక్కుతున్న ఈ సినిమాలో నానా పటేకర్ కీలక పాత్రలో కనిపించనున్నాడు.
సుదీర్ఘ విరామం తర్వాత బాలీవుడ్ కు తిరిగి రావడం పట్ల కుష్బూ సంతోషం వ్యక్తం చేస్తూ.. 'నేను చివరిసారిగా హిందీ చిత్రాల్లో నటించి 35 ఏళ్లు అవుతోంది. హిందీ చిత్రం 'ప్రేమ్ దాన్' షూటింగ్ 1989లో పూర్తయింది.
ఆ తర్వాత నేను హిందీ సినిమాల్లో నటించలేదు. ఇప్పుడు, నేను పూర్తిగా పునరుత్తేజం పొందాను. నానా పటేకర్ తో కలిసి పనిచేయడం ఆనందంగా ఉంది. ఆయన అద్భుతమైన నటుడు అని అందరికీ తెలుసు.
ఆ సమయంలో దక్షిణాది సినిమాలతో బిజీగా ఉండటంతో హిందీ సినిమా ప్రాజెక్టులు చేపట్టలేకపోయాను. ముఖ్యమైన పాత్రతో హిందీ సినిమాల్లోకి రీఎంట్రీ ఇవ్వడం చాలా ఆనందంగా ఉంది'' అన్నారు.